Hesablama Palatasının Təlim Mərkəzinin açılışına həsr olunmuş Toplantı keçirilmişdir
Əlavə olunub: 2019-12-06

Hesablama Palatasının sədri Vüqar Gülməmmədov Toplantını açaraq öncə Hesablama Palatasının yaranmasının 18 illiyi münasibəti ilə Toplantı iştirakçılarını və Palatanın kollektivini təbrik etdi, 7 dekabr 2001-ci ildə  fəaliyyətə başlamış  Hesablama Palatasının   yaranmasının  Azərbaycan Respublikasının Konstitusiyasının 92-ci maddəsində  təsbit olunduğunu xatırlatdı.

 

Azərbaycan Respublikasının Hesablama Palatası haqqında ötən il qəbul olunmuş yeni Qanunun 36-cı maddəsinə əsasən Hesablama Palatasının nəzdində yaradılan Təlim Mərkəzinin məqsədinin yeni təyin edilmiş və Hesablama Palatasında çalışan işçilərin bilik və bacarıqlarının, peşə hazırlıqlarının artırılması, kadr potensialının yüksəldilməsi, ali audit orqanlarının beynəlxalq standartlarının və qabaqcıl təcrübələrin öyrənilməsi işinin təşkil edilməsi olduğunu bildirdi, qeyd etdi ki, Mərkəzin əsas vəzifələrindən biri də təlimlər yolu ilə biliyin daim təkmilləşdirilməsi, eyni zamanda yeni biliklərin mənimsənilməsinə  nail olmaqdır.

 

Hesablama Palatasının sədri Vüqar Gülməmmədov Mərkəzin yaradılması zərurətindən və Palatanın funksional fəaliyyəti üçün  əhəmiyyətindən danışdı. Təlim Mərkəzinin ilk vaxtlarda işə yeni qəbul edilmiş və Hesablama Palatasında çalışan işçilərin öyrədilməsi ilə yanaşı Mərkəzin özünün də öyrənməsinin vacibliyini bildirildi.   

 

Hesablama Palatasının Təlim Mərkəzinin baş məsləhətçisi Ramal Əzizov Mərkəzdə təlim üçün yaradılan şəraitə görə rəhbərliyə minnətdarlıq etdi, görülən işlər barədə məlumat verdi.

 

R.Əzizov Təlim Mərkəzində ilk vəzifə kimi Hesablama Palatası əməkdaşlarının təlim ehtiyaclarının araşdırıldığını, bu ehtiyaclar nəzərə alınmaqla Hesablama Palatasının Təlim Mərkəzinin 2020-ci il üçün illik iş planının layihəsinin  hazırlandığını, Palata rəhbərliyinin tapşırığına uyğun olaraq İnzibati xəta haqqında iş üzrə icraatın aparılması ilə bağlı  Hesablama Palatasında çalışan işçilərin bilik, bacarıqlarının və hazırlıqlarının daha da təkmilləşdirilməsi məqsədilə  ümumilkdə 75 əməkdaşın iştirak etdiyi 4 təlim təşkil edildiyini, Mərkəzdə  “Dövlət qulluğu haqqında qanun-dövlət qulluğunun ilkin əsası” mövzusunda təlim keçirildiyini, Hesablama Palatası əməkdaşlarının  xarici dil bilik səviyyəsinin artırılması məqsədilə hər biri 10 nəfərdən ibarət olmaqla, ümumilikdə 20 nəfər əməkdaşın - ilkin başlayanlar və baza biliklərə malik olanlar - 2 qrup  üçün təlimlər keçirildiyini bildirdi.

 

R.Əzizov Maliyyə uçotu(F3) proqramı üzrə təlimlərin 4 ay müddətində davam etməsinin  planlaşdırıldığını, daha sonra F7(Maliyyə Hesabatları) və Diploma in International Financial Reporting (DipIFR) beynəlxalq maliyyə və mühasibat uçotu ilə bağlı diplomun verilməsi ilə nəticələnəcək təlimlərin keçirilməsi, həmçinin CFA-Chartered Financial Analyst (maliyyə analizi və investisiya sahəsi) üzrə təlimlərin keçirilməsinin nəzərdə tutulduğunu,  bu təlimlərin hər birinin ingilis dilində tədris olunduğunu, ona görə də ingilis dili üzrə təlimlərinin davamlı olmasının zəruriliyini vurğuladı.

 

R.Əzizov Hesablama Palatası işçilərinin beynəlxalq səviyyədə daha rəqabətqabiliyyətli biliklərə sahib olmasını təmin etmək məqsədilə bu təlimlərin təşkil olunması üçün məqsədyönlü addımların atılmasının planlaşdırıldığını qeyd etdi və  Hesablama Palatasının Təlim Mərkəzinin 2020-ci il üçün illik iş planı layihəsini təqdim etdi.

 

Hesablama Palatasının sədri Vüqar Gülməmmədov Palatada xeyli sayda normativ metodiki sənədlərin hazırlanıb təsdiq edildiyini, bununla belə funksional fəaliyyət üçün zəruri yeni metodiki sənədlərin tərtib edilməsi üçün təkliflər verilməsini, təlimlərdə intizam və davamiyyətə xüsusi diqqət yetirilməsini, Palatada əldə edilmiş nailiyyətlərdən daha çox çatışmazlıqları üzə çıxarıb təlimlərdə üzərində işləməyi tövsiyyə etdi,  Palatanın struktur bölmələrinə Təlim Mərkəzinin işinə dəstək olmağı tapşırdı.